Bazenekien osasuna, faktore biologikoez gain, gizarte-, ekonomia- eta ingurumen-baldintzek ere baldintzatzen dutela? Eta osasunerako sarbidea desberdina dela munduko herrialdeetan zein herrialde bereko eskualde desberdinetan? Hauek dira Farmamundik Bizkaiko Lehen Hezkuntzako ikasleekin aztertu dituen gaietako batzuk.
2023 martxoan amaitu dugu proiektuaren lehen fasea, ikasturtean zehar landu duguna. Fase horretan ohitura osasungarriak, osasunaren determinatzaileak eta desparekotasunak aztertu ditugu gymkhanen, jokoen eta ikasleen parte-hartze handiaren bidez.
Diseinatutako jardueren artean, ikasleek osasunaren definizioa sortu dute eta baita egun osasungarri bat nolakoa izango litzatekeen ere. Besteak beste, osasunaren mugatzaileak zeintzuk diren ikasi dute, hau da, pertsonen osasunean eragiten duten faktore guztiak hala nola elikadura, ariketa fisikoa, atsedena, higienea, hezkuntza, ingurumena, genero-berdintasuna edo gizarte-partaidetza.
Azkenik, ikasleentzako bereziki diseinatutako rol joko baten bidez, beste pertsona batzuen azalean sartu ahal izan dira, haien motibazioak eta egunerokotasunean dituzten arazoak ezagutu ahal izan dituzte, gure osasun fisikoan, mentalean edo sozialean eragina izan dezaketenak, eta, horrela, testuinguru desberdinetan bizi diren pertsonekin alderatu dira. Jarduera honen bidez, munduan dauden desberdintasunez eta osasun globala hobetzeko elkartasunak eta lankidetzak duten garrantziaz jabetu ahal izan dira.
Proiektuak irakasleen babesa izan du, eta modu aktiboan lagundu du proposatutako jardueran diseinatzen. Beraz, Farmamunditik eskerrak eman nahi dizkiegu parte hartu duten ikastetxe guztiei beraien inplikazioagatik eta gogo biziagatik. Espero dugu esperientzia aberasgarria eta motibagarria izaten ari dela ikasleentzat, eta osasunerako eskubidearekin herritar kritiko eta konprometituak sustatzen ari garela.
Oraindik zati interesgarri bat gelditzen zaigu egiteko, hala nola osasun-aktiboak identifikatzen eta definitzen ikastea, hau da, ongizatea ematen dieten ikastetxeko lekuak, pertsonak, zerbitzuak eta abar. Ikasleek lehendik dauden aktiboak identifikatzeaz gain, ikastetxean egotea gustatuko litzaiekeenak eta horiek aldarrikatzeko bidea hasiko luketenak identifikatuko dituzte.